võro on Reklaabu

Tühjä tuust kuningast

Sun, 05 Apr 2026 01:32:10 +0300

Lugu peris elost. Latsõ opsiva koolih, kuis malõt mängi. Üts vanõmba klassi poiss tulle kah mängmä. Midägi tä käikest tiidse kah, a sääl ringih es olnu käünü. Mängse üte noorõmbaga, kiä olli õkva midägi opnu. Vanõmb poiss sai päähä, lask uma kuninga ärq võtta. Ku väikumb poiss ütli, et näeh, ärq võitse, ütli vanõmb vasta, et tühjä tuust kuningast, mäng om jo viil poolõlõ, mängime iks lopuni ärq.

Kuulsus tulle küllä

Mon, 23 Mar 2026 17:42:00 +0300

Lugu peris elost. Üts miis olle säändse nimega, miä om mitmal eestimaaladsõl ja üts noist om eski tunnõtu spordimiis. Tuu spordimehega es olnu mehel muidoki määnestki köüdüst. Ütskõrd tahtse tä minnä külla määndsidki asatoimõnduisi aama tutva mano. Kõnõldi kokko, et tä lää tutva tüü mano kimmäl kuupääväl ja kelläaol. No joudse veidi varrampa. Uudi veidi ja kontorih olli tasalik, mõni ütsik liikse. Ku aig käeh, nõsi püstü ja naksi kalitori pite minemä. Ja kos siis juhtu: üts uss läts valla, sis tõnõ, kolmas ja nii edesi, kõrraga olli egäütel kalitori asja, kiä kohvitassi täütmä, kiä midägi vällä trükma, kiä niisama pausi tegemä. Miis hiitü veidü, et miä tuu õkva valla läts. A sis sai arvu, et timä hindä nimi olle tuu pistüjalakuunolõgi lättes ja tä pei väega kinni pidämä, et kalitoris naarma es purdsanu. Tutva ruumi jõuden naardsiva mõlmõmba hinnäst põrmandulõ, silmaq pääh likõq.

Jäi vindläses

Fri, 20 Mar 2026 20:14:09 +0300

Lugu peris elost. Juhtu katsakümnide lõpuh. Väiku poiskõnõ olli sanatooriumih ja sääl olli ka tõisi latsi. Üts ütli midägi, a latskõnõ es saanu tuust midägi arvu ja küsse kasvataja käest perrä, et mille tä nii andsagult kõnõlõs. Kasvataja ütli, et tuu lats kõnõli vinne keeleh. Tuu pääle küsse lats vasta: “A mille tä vindläses jäi?”

Peris piim

Mon, 09 Mar 2026 18:37:11 +0300

Lugu peris elost. Kavvõlt Ameerigamaalt olliva küläh ja Euruupah ringi reismäh kats nuurmiist. Tetti kuun süvvä ja kõnõldi niisama elost ja olost. Külmäkapist sai vällä võetus ka piimäpakk. Nä näi, et pääle oll kirotet 3,5% ja üts ütel tuupääle, et timä taht iks peris 100%-list piimä juvvaq, mitte ärq lahjendet 3,5%-list. Tuud juttu kuuldõh jäi vakka ja es julgugi seletämä naada ja tälle häpü tetäq, las kiäki tõnõ koski muial võtt tuu rassõ tüü ette.

Näütlejä taust

Sun, 08 Mar 2026 01:31:50 +0300

Lugu peris elost. Tüü mant naati bussitävve inemiisiga liinast vällä pitto seitma ja seideti viil üte maja mant läbi, kost pidi pääle tulõma õdagujuht. Hinnõpi olli teedä antu, et õdagut juht see ja see, om tennü tuud ja tuud ja om eski näütlejä taustaga. Maja man buss uutse veidü ja piä ollgi õdagujuht tulõmah. Bussi seeh kiäki ütli tõsõlõ, et miis pidi olõma näütlejä taustaga. Tõnõ kai aknast vällä, näi miist ja küsse vasta, et kos tuu taust sääl om.

Sibuulja

Tue, 24 Feb 2026 12:22:20 +0200

Lugu peris elost. Juhtu 1990. aastidõl. Jaanil olle liina lähküh põllulapikõnõ kardohkidõ, sipulidõ, põrknidõ ja muu säändsega. Tuu kotos oll mõtsa takah tüü man. Tuul halval aol iks juhtu, et käveti ka aiamaid pite vargil. Ütskõrd ütli sõpõr Jaanile: “Kuulõ, sul om aiamaa pääl Sibuulja käünü, keik om lakõs tettü!” Jaan ütli rahuligult vasta: “Ma esi käve eelä sääl ja korassi keik ärq.”

Susi

Tue, 24 Feb 2026 09:55:22 +0200

Lugu peris elost. Memm olli hummi latsiga suvõkodoh maal. Kassikõnõ oll ka üteh võetu, Susi nimes. Tull aig ärq sõita, a kassikõist paistu-es koski. Memmekene küsse: “No kos ti tuu Soe pannit?”